Transmetimi i programeve të ndryshme televizive nëse nuk posedon të drejtat e autorit përbën shkelje të ligjit dhe është e dënueshme. Në Shqipëri kjo çështje nuk njihet shumë dhe baza ligjore është kritikuar shpesh për mangësi të theksuara. Ndërkohë, edhe për qytetarë të ndryshëm përbën shkelje ligjore përdorimi i aparateve që transmetojnë programe apo kanale të ndryshme televizive në mënyrë pirate.
Shpesh herë në vend janë kryer kontrolle në biznese të ndryshme, kryesisht pika bastesh për bllokimin e paisjeve të tilla. Por fenomenit jo vetëm që nuk i është dhënë fund, por qytetarë të ndryshëm të informuar për paisje të tilla janë paisur në banesat e tyre, ku evidentimi është thuajse i pamundur.
Nëse nëpër pikat e basteve policia ka disa motivacione që i ligjërojnë kontrollet, kjo nuk mund të kryhet në banesa private. Persona që tregotjnë paisje të tilla, paguhen për aparatin por edhe për abonimet, që funksionojnë njësoj si subjektet e ligjshme.
Aksioni
Policia e Tiranës ka ndërmarrë disa kontrolle në disa rrugë të kryeqytetit, kryesisht nëpër pika bastesh për bllokimin e paisjeve pirate. Të paktën 2 persona janë proceduar për posedimin dhe vënien në përdorim të këtyre paisjeve në bizneset e tyre. Sipas policisë materialet ndaj tyre janë referuar në Porkurorinë e kryeqytetit. Policia procedoi 31-vjeçarin me inicialet E.M. i cili rezulton pronar i 3 pika bastesh në zona të ndryshme të Tiranës. Këtij shtetasi policia i bllokoi 4 dekodera piratë që gjeti në bizneset e tij.
Po ashtu, u procedua edhe një 22-vjeçar me inicialet A.P. Edhe këtij shtetasi policia i gjeti në biznesin e tij një aparat pirat që transmetonte programe në mënyrë të jashtëligjshme. Bëhet me dije se ky aksion pritet të zgjerohet edhe më tej nga policia e cila do të ushtrojë kontrolle në të gjithë Tiranën, me qëllim ndëshkimin e personave që shkelin ligjin./Javanews
