Kreu i Kuvendit Ilir Meta ka reaguar në lidhje me deklaratat e Presidentit Ivanov dhe Gruevskit, duke u shprehur se retorikat nacionaliste anti- shqiptare në Maqedoni janë shqetësuese dhe cënojnë stabilitetin e vendit.
“Shpreh shqetësimin për situatën e rënduar politike në Maqedoni dhe inkurajoj të gjitha forcat politike në vendin fqinj për qetësi, përgjegjshmëri dhe konstruktivitet.
Dëshiroj të shpreh gjithashtu keqardhjen për retorikat nacionaliste anti-shqiptare të cilat cenojnë harmoninë dhe bashkëjetesën ndër-etnike – si garanci për stabilitetin e vendit fqinj.
Shpresoj që gjithë aktorët institucionalë dhe politikë të tregojnë përkushtim për progresin demokratik dhe euro-atlantik të Maqedonisë.”- shkruhet në reagimin për shtyp të Metës.
