Çdo i punësuar, përpara se të marrë pagën e muajit janar ka detyrimin ligjor të plotësojë Deklaratën e Statusit Personal. Këtë deklaratë e ka punëdhënësi dhe e firmos çdo punonjës një herë në vit. Ky dokument është një risi që rrjedh nga Ligji për Tatimin mbi të Ardhurat dhe nuk shoqërohet me kosto shtesë.
“Deklarata e Statusit Personal është një marrëdhënie mes dy palëve, punëdhënësit dhe punëmarrësit. Për ata që kanë një punë, ky element është i paraplotësuar apo i shënjuar në listëpagesën e të ardhurave nga puna. Ky dokument është i rëndësishëm për tu plotësuar dhe i thjeshtë”, sqaroi Rozana Çelmeta nga drejtoria e tatimeve.
Por kjo deklaratë ka rëndësi për ata që bëjnë dy apo më shumë punë. Formulari plotësohet vetëm një herë në një punëdhënës. Në vendin e punës që plotësohet ky formular bëhen dhe zbritjet që parashikon ligji.
“Ajo çfarë ndodh me të dypunësuarit është se duke qenë se individi ka të drejtë që zbritjet ti kërkojë njëherë vetëm në një punë, tek subjekti që ka nënshkruar këtë status, atëherë në subjektet e tjera të ardhurat që realizohen gjatë një muaji do ti tatohen bruto”, sqaroi Çelmeta .
Deri më tani ligji parashikonte që ndaj të dypunësuarve, të ardhurat bashkoheshin në fund të vitit dhe i nënshtroheshin tatimit, pas plotësimit të deklaratës së të ardhurave vjetore, DIVA.
Me ndryshimet ligjore, tatimi nuk do të mbahet një herë në vit, por çdo muaj, por ndërkohë detyrimi për plotësimin e DIVA-s mbetet në fuqi.
