Lëvizja Socialiste për Integrim ka reaguar për deklaratën e deputetit të saj Përparim Spahiu, lidhur me Reformën në Drejtësi. Deputeti kishte shprehur votën kundër monitorimit të vettingut nga SHBA dhe BE.
“E kuptoj dhe jam dakord që sovranitetin e vendit tonë të përbashkët duhet ta ndajmë me NATO, me KE, shpresoj dhe me BE! Por nuk jam gati të votoj ndarjen e sovranitetit me Operacionin Ndërkombëtar të Monitorimit! Çfarë përfaqësojnë këta?!!”, është deklarata e Spahiut.
Pas këtyre fjalëve, LSI reagon, duke thënë se bëhet fjalë vetëm për qëndrim personal dhe jo qëndrimin e partisë. Sipas News 24, javën e ardhshme pritet të mblidhet grupi parlamentar i LSI, ku do të diskutohet edhe për deklaratat e Spahiut.
Po sipas News 24, disa burime kanë bërë të ditur se Spahiu rrezikon deri përjashtimin nga partia dhe grupi parlamentar.
d.i.
