Vrasja e shqiptares 31-vjeçare, Anisa Shehu mund të ishte shmangur nëse policia, që u lajmërua nga fqinjët e çiftit, do të ndërhynte.
“Protothema” citon këtë të hënë, fqinjën e Anisa dhe 40-vjeçarit Florand Shehu, e cila ka zbuluar më shumë detaje mbi jetën e dy shqiptarëve që jetonin në zonën e Daphne.
Duke folur për mediat greke, zonja ka treguar se ajo ka telefonuar sallën operative të Policisë së zonës ditën e krimit për të raportuar për dhunën në familjen e shqiptarëve.
Sipas fqinjës, policia, megjithëse mbërriti në vendngjarje pas raportimit të saj, e injoroi incidentin dhe u largua pa u përpjekur të ngjitej në shtëpinë nga ku dëgjoheshin britmat.
Ajo tha se mes tyre kishte pasur zënka shumë të shpeshta dhe tension në dy vitet e fundit.
“Praktikisht pati shumë sherr. Në përgjithësi ka pasur tension në shtëpinë e tyre gjatë dy viteve të fundit. Dëgjova shumë zhurmë, shumë kërcitje dhe për shkak se e dëgjova këtë, kërkova ndihmë dhe telefonova sallën operative.
Më thanë nga salla se makina që patrullonte zonën do të mbërrinte për 25 minuta.
Por për shkak se sherri ishte shumë i madh, i kërkova të dëgjonin përmes celularit tim se çfarë po ndodhte në shtëpinë ngjitur me timen. Më thanë të jepja të dhënat dhe se do të vinin menjëherë”, u shpreh Sylvia Mourouti.
Brenda pak minutave, policia mbërriti në vendngjarje, por u largua pa ndërhyrë.
“Policia thjesht uli xhamin e makinës kur u afrua aty dhe më pas u largua. Dola në ballkon dhe prita që ata të hynin në shtëpinë e ciftit. Në fillim mendova se do të parkonin makinën. Por jo për fat të keq. U larguan pa u ngjitur në shtëpinë ku po ndodhte ‘luftë’” , theksoi fqinja e viktimës 31-vjeçare shqiptare.
