Pas tensioneve sot në Kuvend mes ish-kryeministrit Sali Berisha dhe deputetit socialist, Erjon Braçe, ky i fundit deklaroi për gazetarët se nuk do të lejonte askënd nga deputetët e opozitës që ta fyente.
“Një herë të vetme do ju përgjigjem të gjithë këtyre që shajnë, duke filluar nga rreshti i parë e deri tek i fundit. Ta kenë të qartë se kanë dhunuar shqiptarët, i kanë vjedhur e vrarë ata. Unë nuk hyj tek kjo kategori. Unë hyj tek të vrarët dhe tek të vjedhurit. Kam hyrë në parlament nga 26 maji, i vrarë nga Sali Berisha dhe banda e tij, ndaj nuk kam për t’i toleruar më fjalët fyese te Arben Ristanit dhe të farë Sali Berishes”, tha Braçe në një prononcim për mediat jashtë sallës së parlamentit.
Ai gjithashtu bëri të ditur se Byroja e Kuvendit do të mblidhet rreth orës 16:30 për të shqyrtuar incidentin e ndodhur mes tij dhe deputetëve të opozitës, në seancën e sotme.
***
Me fillimin e seancës demokratët kanë kërkuar mbledhjen e Byrosë së parlamenti për të marrë masa ndaj deputetit Braçe. Tensioni është rritur sërish dhe deputetët e opozitës kanë bllokuar foltoren. Është dashur ndërhyrja e gardës për të qetësuar deputetët. Deputeti demokrat Roland Keta i është vërsulur deputetit Braçe i cili po qëndronte pa lëvizur në foltoren e parlamentit.
***
Parlamenti shqiptar ka degjeneruar sërish në fjalor fyes dhe një tentativë e deputetit demokrat Edi Paloka për të goditur me grusht socialistin Erjon Braçe. Në aulën e parlamenti ndodhej deputeti Braçe, i cili duke akuzuar Berishën, ka bërë që shumë prej demokratëve të irritohen, përfshi edhe ish kryeministrin.
Brace flet nga foltorja
Brace: Nuk ke lënë njeri pa e damkosur ti vetë. Do vish ta provosh në gjykatë këtë. O Sali, Sali, mos bëj si qen, po ulu se e di unë ca halli ke ti. Ulu mor, ulu…
Berisha: Je klysh i vogël
Brace: Dëgjo ti qen i madh, dëgjo, dëgjo
Ristani: Po klysh kone, po, po flet ti klysh kone
Brace i kthehet: Buçe, buçe
Berisha flet nga vendi
Brace i kthehet: Si s’të vjen turp, turp të të vijë
Berisha: Je klysh i vogël ti…
Kaq dhe Paloka drejtohet tek vendi ku ndodhej Brace dhe tenton ta qëllojë. Garda rrethon Bracen dhe nxjerr mediat nga salla e Kuvendit
