Dhjetra pasagjerë kanë mbetur të bllokuar prej orësh në aeroportin e Rinasit për shkak se avioni ‘Blue Panorama’ me të cilin duhet të ishin nisur në Milano ka pësuar defekt.
Plot 130 pasagjerë, shqiptarë e të huaj kanë mbetur të bllokuar në aeroport prej 4 orësh, kohë që do të kishte qenë e mjaftueshme për të mbërritur në Milano.
Por aventura e tyre nisi sapo vunë këmbën në avion. Pak pasi hipën, 130 pasagjerë u zbritën nga avioni pasi ekuipazhi në bordin e avionit të kompanisë ‘Blue Panorama’ i njoftoi se avioni ka defekt. Por pasi kanë zbritur prej orës 11:45 minuta pak para mesditës, pasagjerët kanë mbetur të bllokuar në aeroport pa asnjë informacion nga kompania, nëse nisja do të mundësohet sot apo në një moment tjetër.
Kompania nuk u ka dhënë asnje sqarim të vetëm përveç njoftimit të defektit në orën 11:45 minuta. Sipas ligjit, çdo pasagjer përfiton rimbursimin e biletës në vlerën 250 euro, kur ka vonesa më shumë se 3 orë në aeroport.
Pasagjerët: Kërkojmë rimbursimin e biletave
Pasagjerët shprehen të revoltuar me neglizhencën e kompanisë ajrore “Blue Panorama”.
Një prej pasagjerëve u shpreh gjatë një lidhje telefonike për Report Tv se nuk është hera e parë që kompania ajrore braktis pasagjerët.
Sipas tij, në radhët e pasagjerëve ka fëmijë dhe të sëmurë të cilët nuk kanë marrë asnjë përgjigje se kur do të nisen në drejtim të Italisë. Ata kërkojnë anulimin e biletës dhe rimbursimin e saj.
“Kemi dëgjuar që nuk është hera e parë që avionët e kësaj kompanie pësojnë defekt. Ka fëmijë dhe të sëmurë. Kompania nuk jep asnjë përgjigje. Duhet të ishim nisur, nuk na kanë sqaruar deri tani. Kërkojmë të anulohet bileta dhe të rimbursohemi”, tha ai.
