Këtë të enjte opozita dhe maxhoranca pritet të kenë një përballje të fortë mes tyre për reformën në drejtësi, “shpejtësia” e së cilës ka arritur maksimumin pas deklaratave të forta të bëra ditën e djeshme nga ana e ambasadorit Lu.
Pavarësisht se opozita ka kërkuar disa ditë kohë për të dhënë pozicionin e saj mbi draftin e ndryshimeve kushtetuese, pritet që palët të shkëmbejnë jo pak akuza kundër njëri tjetrit për reformën.
Ndër shumë nga mesazhet që dha Lu ditën e djeshme, njëri prej tyre mund të jetë dhe një tabelë qitje mes palëve. Ambasadori i SHBA-ve tha në mbledhjen e djeshme të komisionit të reformës se ai mëshiron ato parti politike apo liderë që mundohen të bllokojnë reformën.
Një deklaratë e tillë është formuluar shpesh e më shpesh nga artikulimet politike të të dy kampeve politike, drejtuar si një akuzë për kundërshtarin.
Rendi i ditës i parlamentit parashikon diskutimin e ndryshimeve në ligjin “Për pyjet dhe shërbimin pyjor”, të ndryshimeve në ligjin “Për fondin kullosor”, si dhe ratifikimin e marrëveshjes mes palës shqiptare dhe Fondit të Kuvajtit për Zhvillimin Ekonomik Arab, për financimin e projektit “Rehabilitimi i rrugës së lumit të Vlorës”.
Seanca ka në rend dite dhe dy raporte vjetore, ai për veprimtarinë e Inspektoriatit të Lartë të Deklarimit e Kontrollit të Pasurive dhe të Institutit të Studimeve të Krimeve dhe Pasojave të Komunizmit në Shqipëri. javanews/ a.k
