Protesta e thirrur nga Partia Demokratike më 10 shkurt kundër qeverisë ka shkaktuar debat mes anëtarit të Kryesisë së PD-së, Grigels Muçollari, dhe kreut të Lëvizjes Bashkë, Arlind Qori, në emisionin Quo Vadis.
Muçollari tha se e gjithë opozita duhet të dalë në protestë për një qëllim të përbashkët, largimin e Ramës, dhe më pas të diskutojnë se çfarë i ndan.
Por për Qorin, kjo nuk është as e ndershme dhe as morale.
Sipas tij, asnjë anëtar i Lëvizjes Bashkë nuk do ta mbështeste një protestë që synon të largojë Ramën për të sjellë në pushtet Berishën.
Pjesë nga biseda:
Muçollari: Thamë që presioni e bën Ramën të japë dorëheqjen. Por unë mendoj se presioni më i madh bëhet kur forcat opozitare flasin për atë që i bashkon. Nëse mes atyre kërkesave është qeveria teknike, kjo na ndan.
Qori: Na ndan oligarkia?
Muçollari: Nuk e dimë atë, është mendimi juaj. Ju folët për një kryetar partie të diskredituar.
Qori: Po.
Muçollari: Është ky kryetar partie që, pas rënies së komunizmit, është – apo kjo parti është – forca kryesore.
Qori: Shihni trendin, jo rezultatin e fundit.
Muçollari: Atë zotëri e kanë votuar 500 mijë qytetarë shqiptarë.
Qori: Krahasoje me vitin 2021.
Muçollari: Krahasoje edhe me çfarë ka kaluar.
Qori: Berisha është i pandehur.
Muçollari: Në respektin që kam ndaj tezave tuaja, pavarësisht se nuk i mbështes, do të doja të respektonit njerëzit.
Qori: Unë respektoj 500 mijë njerëz, por jo Berishën.
Muçollari: Për të rrëzuar Ramën, a është më i madh presioni?
Qori: Jo. Në rastin e Lëvizjes Bashkë, nëse mua “ma merr perëndia mendjen” dhe mbështes Berishën, ata njerëz nuk vijnë më me mua. Unë jam frymë.
