Komisioni i Venecias ka miratuar sot, më 6 dhjetor, opinionin që kishte kërkuar Kryetarja e Kuvendit të Shqipërisë, Elisa Spiropali, me në lidhje me mandatin e deputetes së PS, Olta Xhaçka.
Sot pati debate mbi publikimin e detajeve prej tij, teksa ka ardhur dhe një reagim zyrtar nga Kuvendi.
Sipas Kuvendit, në seancën e sotme plenare të Komisionit Evropian për Demokraci Nëpërmjet Ligjit i njohur si Komisioni i Venecias u shqyrtua kërkesa e Kryetares së Kuvendit Spiropali nëse “Gjykata Kushtetuese mund të imponojë një deputet se si duhet të votojë”.
“Ky Opinion do të botohet nga Komisioni i Venecias, sipas rregullave dhe procedurave të aplikueshme prej tij. Deri në datën e publikimit, Kryetarja e Kuvendit, në cilësinë e kërkueses së këtij opinioni, do të vijojë të respektojë ruajtjen e konfidencialitetit të dokumentit në fjalë, siç ka bërë deri më sot, në zbatim të detyrimeve që përcaktohen në rregullat e punës së Komisionit të Venecias”, njofton Kuvendi.
Më herët u bë e ditur se Komisioni i Venecias i dha të drejtë mazhorancës, duke deklaruar se deputetëve nuk mund tu imponohet se si të votojnë. Më pas reagoi PD, e cila flet për lajme të rreme.
“Grupi Parlamentar i PD dënon me forcë sjelljen dezinformuese të Kryetares së Kuvendit që synon të krijojë konfuzion në opinionin publik, vetëm me qëllim që të mbrojë pandëshkueshmërinë e bashkëpunëtores së Edi Ramës, deputetes strategjike Olta Xhaçka, si dhe të fsheh faktin se për herë të parë në 34 vite Kuvendi ka refuzuar të zbatojë dy vendime të Gjykatës Kushtetuese”, deklaronte PD.
Pritet që në ditët në vijim të kemi dhe opinionin final që do t’i japë fund një herë e mirë këtij debati.
/S.T
