Seanca e Kuvendit ka nisur me përplasje mes PD dhe PS, lidhur me futjen e disa ligjeve në rendin e ditës. Opozita akuzon qeverinë se po i përdor këto ligje si aset elektoral për të marrë vota për PS, ndërsa nga ana tjetër mazhoranca thotë se ligjet janë për të gjithë shqiptarët dhe për një kohë të gjatë, jo vetëm për javët e fushatës zgjedhore.
Një nga ligjet e futura në rend dite është edhe Paketa e Maleve, ku deputetja demokrate Ina Zhupa akuzon PS se do t’i përdorë si grante për të blerë votat e zgjedhjeve të 11 majit.
“Ju keni futur në projekt-program Paketën e Maleve pa datë se kishit parashikuar një datë boshe në protokollin e parlamenti më 10 janar ku sipas jush nuk futen në periudhën zgjedhore. Jeni duke përdorur parlamentin si aset elektoral. Deputetët po kthehen në firmosës të fondeve publike me qëllim votën për PS. 100 fonde do shpërndahen nga Paketa e Maleve. Ju fusni ligjet që do i përdorini si kartë elektorale për fushatën e 11 majit”, tha Zhupa.
Në përgjigje të saj, kreu i grupit parlamentar të PS, Niko Peleshi tha se këto akuza nuk qëndrojnë dhe se ligjet kanë kaluar të gjithë procedurën ligjore në komisione para se të vinin në Kuvend.
Sipas tij, ligjet janë për periudha të gjata kohore që i shërbejnë shqiptarëve dhe jo një partie të caktuar
“Është e qartë për të gjithë, parlamenti nuk bënë ligje vetëm për një pjesë të shqiptarëve apo vetëm për një parti, por ligjet janë për të gjithë. Ligjet nuk janë për një periudhë disa javore deri në zgjedhjet e ardhshme, nuk ka një tentativë të tillë. Ky argumentim është i tepër dhe nuk qëndron. Nuk ka ligj që futet befas në seancë dhe miratohet. Të gjithë ligjet kalojnë procedurën në komisione dhe nëse opozita do vërej ndonjë prej ligjeve element që bien ndesh me Kodin Zgjedhor natyrisht do mbahet qëndrimi në komision dhe nuk kemi pse paragjykojmë çdo hap dhe propozim që bëjmë. Paketa e Maleve nuk ka për qëllim të shpërndajë grante për socialistët e zonave malore, por i shërben të gjithëve. Kjo paketë është për t’u vënë në zbatim për një kohë të gjatë dhe jo vetëm para zgjedhjeve. Nuk është ligj për partinë, por për Shqipërinë”, tha Peleshi.
