Vota e emigrantëve ka shkaktuar përplasje mes opozitës dhe mazhorancës ditën e sotme gjatë seancës parlamentaare.
Opozita kërkon që emigrantët shqiptarë që jetojnë nëpër botë të votojnë në zgjedhjet e 11 majit me pasaportat e përkatësisë së vendit ku jetojnë, në rast se ata nuk disponojnë mjet identifikimi shqiptar.
Nga ana tjetër, ministri i Drejtësisë, Ulsi Manja tha se kjo nuk është e mundur pasi nuk e lejon Kodi Zgjedhor.
Socialisti foli me tonë të ashpra ndaj opozitës, duke thënë se sipas tij PD nuk e ka dashur kurrë votën e diasporës teksa u bëri thirrje që të votojnë ligjin për lehtësimin e votës së emigrantëve.
Ulsi Manja: Tani që të jesh shtetas shqiptar ju e dini se ka dhe detyrime. E drejta e votës është e drejtë kushtetuese që nuk mohohet, ama që të ushtrohet kjo e drejtë duhet ose pasaporte ose kartë identiteti, sipas kodit zgjedhor. Në respekt të atij shteti duhet të kesh dokument të atij shteti. Ju thoni s’ka problem t’i jepet e drejta e votës me një dokument identifikim nga çfarë kanë në botë. Është respekt për shtetin, ju në vend që të votoni ndryshimet për votën e diasporës, e bllokoni sepse ju nuk e keni dashur asnjë herë votën e diapsorës. Lërini këto pallavra. Lërini sofizmat juridike. Kush disponon dokument identifikimi shqiptar të skaduar sigurisht mund të votojë.
