Mungesa e disa anëtarëve të KLD ka bërë që të ketë një debatë të ashpër në mbledhjen e 12 tetorit mes të pranishmëve.
Debati nisi mes gjyqtarit Gjin Gjoni dhe Sokol Çomos.
Ky i fundit pas disa minutash debat u largua nga mbledhja.
Kjo ka bërë që Gjoni të shpërthejë kundër atyre që munguan duke thënë se Ministri i Drejtësisë, Nasip Naço, vjen në mbledhje vetem kur ka emërime apo shkarkime.
“Ashtu siç edhe si gjithë të tjerët, edhe unë i bëj thirrje kryetarit të Gjykatës së Lartë që të jetë më korrekt në mbledhjet e Këshillit të Lartë të Drejtësisë, edhe ministrit të Drejtësisë që nuk vjen fare në mbledhjet e Këshillit të Lartë të Drejtësisë, se si duket duhet që rendi i ditës të mbingarkohet me emërime ose me shkarkime, që njerëzit të jenë prezentë për interesa klienteliste. Por, në momentin që ka një rend dite normal dhe ka një sistem vlerësimi dhe emërohen magjistratët, këta ikin. Mua s’më duket normale”, tha Gjoni.
Përveç Naços në KLD mungonin gjyqtarët Xhezair Zaganjori, Dritan Broci, Astrit Haxhialushi, Flamur Kapllani, Tritan Hamitaj, Albana Shtylla.
