Trajneri Gianni De Biasi ka zbuluar listën e lojtarëve, që ka thirrur për ndeshjen kualifikuese të 12 nëntorit, të cilën do ta luajë në “Loro Boriçi”, ora 20:45, ndaj Izraelit. Ka përjashtime, por edhe rikthime, ashtu si rikonfirmime. Arlind Ajeti, që ka lënë pas dëmtimin, rikthehet në grumbullimin kuqezi. Rikonfirmohet Eros Grezda, që ishte pjesë e kombëtares edhe në dy kualifikueset e muajit të kaluar, edhe pse nuk luajti asnjë minutë. E njëjta gjë mund të thuhet edhe për Thoma Strakoshën, Azdren Llullaku. Edgar Çani “mbijeton” po ashtu në planet e 60-vjeçarit nga Sarmede, ndërkohë që pranë kombëtares do të jetë edhe Armando Sadiku, edhe pse nuk ka luajtur fare pas dëmtimit. Në sulm është “sakrifikuar” Sokol Cikalleshi, i cili nuk po luan fare me klubin e tij në Turqi. Mungesa e emrit në këtë listë konfirmon problemet mes Ergys Kaçes dhe De Biasit. Mesfushori ynë kuqezi nuk është ftuar, duke zbuluar përplasjet që ka pasur në kualifikueset pararendëse, kur mosaktivizimi desh e çoi në braktisje të grumbullimit kuqezi.
Mungon sërish Shkëlzen Gashi, që ka shkëlqyer me Colorado Rapids në MLS, dje shënoi një eurogol. Vazhdon justifikimi i De Biasit për lënien jashtë të tij, zgjedhje teknike, çka lë të nënkuptohet se edhe me këtë futbollist ka nisur një “luftë të ftohtë”.
Për kundërshtarin, trajneri thekson se Izraeli nuk duhet anashkaluar dhe të shprehemi se kemi të bëjmë me një ndeshje të lehtë.
“Është skuadër shumë e mirë dhe vetëm ata që janë joprofesionistë mendojnë se kjo do të ishte ndeshje e lehtë, ju them që nuk është aspak e lehtë. Është ekip shumë i mirë dhe duhet të kemi shumë kujdes”.
De Biasi publikon emrat: Kaçe, Gashi e Cikalleshi mbeten jashtë kombëtares
