Gianni De Biasi ka dhënë një intervistë për gazetën italiane La Repubblica pas fitores së kuqezinjve me Rumaninë. Trajneri i shqiptarëve ka folur për faktin e këndimit të himnit tonë kombëtar, duke e cilësuar si të komplikuar për të, por pavarësisht, ka thënë De Biasi, ai mbetet i bukur dhe tërheqës.
“Është shumë i bukur, më tërheq, – thotë De Biasi duke shpjeguar, – Fjalët janë pak të vështira, di domëthënien, por për t’i shqiptuar e kam pak të komplikuar, për fat gjatë ekzekutimit ndihmoj veten me ekranin e karaokes që është në stadium. Ky është një popull i jashtëzakonshëm, ka njohur diktatura dhe vuajtje, gjejmë tifozë shqiptarë kudo shkojmë, një pasion i jashtëzakonshëm”, thotë De Biasi.
De Biasi ka folur edhe për vendimin e tij për të lënë në stol kapitenin Cana dhe sesi e ka pritur ky i fundit.
“Ishte një vendim i vështirë, Canës ja thashë vetëm pak orë para ndeshjeve. Gjithsesi duhet ti heqim kapelen, u vu mënjëherë në dispozicion të shokëve, i karikoi dhe i mbështeti, pati një sjellje prej burri të madh dhe prej kapiteni të madh. Por në kompleks ishte gjë e bukur të shikonim këta djem me dëshirën për të mahnitur Europën, dhe ja dolëm. Jemi rritur, jemi ata që do të doja të ishim, dhe jemi gati për të ecur përpara”.- tha De Biasi./java/a.k
