Gianni De Biasi e ka quajtur historik vitin 2016, pasi kombëtarja shqiptare, e drejtuar prej tij, mori pjesë në finalet e kampionatit evropian në Francë, ku mori edhe fitoren e parë, kundër Rumanisë.
Euro 2016 ishte një kulm për skuadrën dhe vetë trajnerin, megjithatë italiani paralajmëroi se mund të largohet nga drejtimi i kuqezinjve, nëse objektivat e tij dhe të FSHF-së nuk përputhen.
“Nëse nesër apo pasnesër objektivat tona nuk janë të njëjta, atëherë unë do të largohem dhe do të shkoj në rrugën time”, tha De Biasi në Ora Skaner.
De Biasi foli edhe për dy nga vendimet e tij më të përfolura, për lënien jashtë të Rashicës dhe Avdijajt.
“Bëra 800 km rrugë për ta parë (Avdijajn). Pashë ndeshjen e Stum Graz dhe nuk pashë asgjë. Sot është më shumë i famshëm për klauzolën që Schalke i vendosi se sa për atë që bën në fushën e lojës çdo javë. Rashica zgjodhi të luajë për Kosovën dhe kjo është një zgjedhje që e ka bërë me qetësi të plotë”, tha trajneri.
d.i.
