Gianni De Biasi i ka sugjeruar Rey Manajt largimin nga Interi. Futbollisti i ri shqiptar u transferua me bujë në një nga skuadrat më të mëdha të Italisë, por, ashtu siç edhe pritej, nuk ka mundur të gjejë hapësira. Aktivizimi ka qenë me pikatore, ndonëse trajneri Roberto Mancini ka treguar se ka besim te djaloshi, i cili ishte ndër gjuajtësit e penalltive, duke shënuar, kundër Juventusit, në gjysmëfinalen e Kupës së Italisë.
Në intervistën pas marrjes së çmimit “Pankina e Artë Speciale”, trajneri i Shqipërisë thotë se një e ardhme larg Interit “do të ishte e dëshirueshme. Nuk dua të fus hundët në punët e Interit, por besoj se një futbollist i ri ka nevojë të vihet në provë çdo të diel. Mendoj se për procesin e tij të rritjes është thelbësore kjo gjë. Nëna natyrë i ka dhuruar të gjithë talentin. Ka personalitet të lartë, ndërkohë që ka vendosur edhe një rekord, duke shënuar vetëm 10 sekonda pasi ka debutuar me Kombëtaren. Është një lojtar që e njeh portën, ka forcën fizike, është i ri dhe besoj se e ardhmja është në favorin e tij. E rëndësishme është që ai të dijë ta menaxhojë si duhet”.
Ndërkaq, një tjetër i ri shqiptar në Itali gëzon një status të ndryshëm. Elseid Hysaj i ka mahnitur të gjithë te Napoli.
“Hysaj për mua është një lojtar që ka cilësi të mëdha, teknike dhe fizike. Lojtar me personalitet, të cilin e kam aktivizuar që 18 vjeç në Oslo, kur po fitonim 1-0 me Norvegjinë. Një futbollist që te Napoli ka ardhur në rritje, kujtojmë që s’ka mbushur ende 22 vjeç. Të luajturit nën presion të madh do ta ndihmojë në vazhdimësi”, thotë De Biasi.
