Një Gianni De Biasi i ftohtë dhe agresiv ishte ai që u shfaq vetëm pak minuta më parë në konferencën për shtyp në FSHF, krejt ndryshe nga paraqitjet e zakonshme, me buzëqeshje e shaka për të gjithë. Kanë qenë deklaratat e drejtorit të Partiznit, Dritan Dervishi, ato që ia kanë prishur humorin, ndërkohë që duket se ka një prishje përfundimtare edhe me mesfushorin Alban Meha.
Në një intervistë për gazetën “Panorama Sport” disa ditë më parë, Dervishi shprehur pakënaqësinë për mosthirrjen e lojtarëve nga kampionati, duke thënë se “De Biasi vjen në Shqipëri për të marrë tituj”.
Përgjigjja e trajnerit ishte pa doreza: “Unë nuk i fus hundët në punët e të tjerëve dhe preferoj që edhe të tjerët të mos fusin hundët në punët e mia”.
“Kombëtarja është e të gjithëve, por jam unë ai që bëj zgjedhjet. Nuk kemi kohë për të bërë eksperimente për të shpërblyer lojtarë të caktuar për paraqitjen në kampionat. E kam parë ndeshjen e Partizanit me Skënderbeun në televizor, ndërkohë që e kanë parë edhe ndihmësit e mi. Unë kam programin tim dhe në Shqipëri nuk vij për të marr tituj, por vij se më kërkon presidenti Duka”.
Ndërkaq, një tjetër person i pakënaqur me De Biasin është Meha, i cili tani luan me Konyaspor në Turqi. Trajneri nuk e ka thirrur dhe lë të nënkuptohet se nuk do ta thërrasë as në finalet e Francës.
“Përderisa nuk është thirrur, do të thotë që edhe mund të mbetet jashtë grupit. Meha në kualifikuese ka luajtur vetëm 13 minuta”, tha De Biasi për mesfushorin e afruar nga vetë ai katër vjet më parë.
Të njëjtin fat si Meha duket se do të ketë edhe Hamdi Salihi, por këtij të fundit italiani nuk ia ka mbyllur derën.
“Në jetë bëhet zgjedhje të vështiura. Më vjen keq, por më duhet të bëj zgjedhje, të cilat nuk bazohen te simpatia apo antipatia për lojtarë të caktuar, por në funksion të ekipit. Megjithatë, ai mund të hyjë përsëri në ekip”, tha trajneri.
Për sa u përket dy ndeshjeve miqësore, kundër Austrisë dhe Luksemburgut, më 26 e 29 mars, De Biasi i ka qëndruar besnik në pjesën më të madhe grupit që arriti kualifikimin historik në Euro 2016.
“Kam marrë skuadrën që na ka sjellë deri këtu, gjatë kualifikueseve të europianit, lojtarë që na kanë kualifikuar. Koha është e shkurtë për eksperimentime. Do të shohim gjendjen e Memushajt që ka marrë një goditje dje, plus Hysaj, i cili ka pasur probleme personale, me humbjen e xhaxhait, kemi edhe Lilën e Abrashit që luajnë sot, e të shohim si janë”.
De Biasi shpjegon pse nuk ka thirrur katër të rinj që gëzojnë formë të mirë: “Nuk kam thirruar Rrahmnanin, Manajn, Rashicën e Latifin, pasi kanë ndeshje të rëndësishme me U21 për kualifikueset e Europianit. Prej tyre do të vijë Rashica, për ndeshjen e dytë”.
Në lidhje me sulmuesin Shani Tarashaj, i cili zgjodhi Zvicrën, De Biasi tha se nuk i interesojnë ata që nuk mendojnë për kombin e tyre.
“Mua nuk më interesojnë lojtarët që nuk mendojnë për kombin e tyre, ndaj nuk kam si t’i llogaris këta lloj futbollistësh. Secili bën zgjedhjen e tij dhe ne jemi te detyruar ta pranojmë”, tha trajneri, i cili e ka thirrur një herë më parë lojtarin, por ai nuk erdhi, duke paraqitur shkaqe personale.
Dritan Ikonomi
