Policia e Shtetit ka përfunduar me sukses operacionin e koduar “DAMASK”, pas një hetimi intensiv që zgjati 12 muaj, duke goditur një rrjet të organizuar të trafikimit të paligjshëm të emigrantëve.
Procedimi penal i regjistruar në vitin 2023 nga Prokuroria pranë Gjykatës së Shkallës së Parë të Juridiksionit të Përgjithshëm Tiranë, identifikoi përgjegjësinë e 24 individëve të përfshirë në këtë aktivitet kriminal.
Gjatë fazës finale të operacionit u arrestuan 15 shtetas, përfshirë 3 shtetas të huaj me kombësi egjiptiane dhe siriane. Për 19 persona u lëshuan urdhra arresti në mungesë. Po ashtu, 4 persona të tjerë janë shpallur në kërkim, ku 3 prej tyre ndodhen jashtë vendit dhe ndaj tyre janë nisur procedurat urgjente për shpalljen në kërkim ndërkombëtar.
15 të arrestuarit dhe personat e tjerë që ende janë në kërkim, janë identifikuar si: Rafael Demaj, Enriko Gjonaj, Mehmet Bregu, Arnold Kërçi, Khaled Shahin, Ahmed Kensova, Dashamir Kullaj, Mohammed Alfahel, Nazmi Avxhija, Juljan Avxhija, Florenc Avxhija, Klajvert Avxhija, Klaudi Mano, Trilind Gjana, Elton Ukaj, Eurel Ukaj, Kelti Xhani, Kastriot Xhani, Ilirjan Xhaferri, Mikel Stefani.
Në fazat e mëparshme të hetimit, policia arrestoi në flagrancë 5 shtetas, 3 prej të cilëve janë në masën e sigurisë “Arrest në burg” pa afat, ndërsa dy të tjerë hetohen me masën “Detyrim për t’u paraqitur në Policinë Gjyqësore”.
“Hetimet dokumentuan përtej çdo dyshimi të arsyeshëm se shtetasit e huaj ishin organizatorët dhe financuesit e këtij rrjeti kriminal, që ndihmonte emigrantë kryesisht nga Lindja e Mesme të kalonin ilegalisht kufirin shqiptar nga Greqia, me destinacion final vendet e Evropës Perëndimore, përmes kufijve veriorë të Shqipërisë në Malin e Zi dhe Kosovë”, njofton policia.
Gjatë këtij operacioni janë sekuestruar 10 automjete, 20,000 euro, 500,000 lekë, 24 celularë, 10 pasaporta dhe fotokopje pasaportash të shtetasve egjiptianë dhe sirianë. Këto sende ishin të lidhura drejtpërdrejt me aktivitetin kriminal të trafikimit të emigrantëve.
Operacioni “DAMASK” u zhvillua me mbështetjen e Drejtorisë së Forcës së Posaçme Operacionale të Policisë Kriminale dhe bashkëpunimin e Drejtorive Vendore të Policisë në Kukës, Durrës, Shkodër, dhe Sarandë, duke shënuar një ndërhyrje të suksesshme në ndalimin e trafikimit të paligjshëm të njerëzve”.
/a.r
