Dalja e Britanisë së Madhe nga Bashkimi Evropian do të godiste miliona persona si edhe do të përbënte të paktën 10 vite paqartësi për qytetarët e Mbretërisë së Bashkuar, doli sot nga një raport i qeverisë britanike mbi pasojat e mundshme të largimit të Londrës nga unioni, njofton gazeta britanike ”The Guardian”, që citon pasazhe të këtij studimi.
Sipas këtij raporti, fenomenet e para që do të goditen janë tregjet financiare, investimet si edhe vlera e stërlinës.
Megjithatë, përkrahësit e Brexit-it thonë se bëhet fjalë për një alarm, që nuk ka shumë bazë.
Kryetari i bashkisë së Londrës, Boris Johnson thotë për ”Daily Telegraph” për një projekt frike dhe shton se zgjedhja e rrezikshme është pikërisht qëndrimi në Bashkimin Evropian.
Dalja nga unioni do të ketë jo pak probleme edhe për dy milionë britanikët që jetojnë në vende të tjera evropiane duke filluar që nga tregu i punës, pensionet dhe deri te përkujdesja shëndetësore.
”Një votë për të dalë nga Bashkimi Evropian do të jetë fillimi dhe jo fundi i një procesi. Kjo do të sjellë të paktën 10 vite paqartësi”, thuhet testualisht në këtë raport.