Në trupin e Astrit Deharit, aktivistit të VV’së, që u gjet i vdekur të shtunën në qendrën e paraburgimit në Prizren, ka pasur shenja të gërvishtjeve sipërfaqësore në njërën dorë dhe në qafë. Këtë e konfirmoi për Gazetën Express, avokati i familjes Dehari, Tomë Gashi.
“Prerje ka pasur në dorën e majtë dhe në qafë, por nga kjo s’mundet dikush me thanë që është vrasje apo vetëvrasje. Ka pasur vetëm gërvishtje sipërfaqësore”, tha Gashi, pak minuta pasi trupit të Astrit Deharit iu krye autopsia në Qendrën e Mjekësisë Ligjore në Prishtinë.
Sipas Gashit vdekja e aktivistit të VV’së në paraburgim ka ndodhur për shkak të asfiksisë – mungesës së oksigjenit, por gjithçka mbetet të konfirmohet përfundimisht nga ekspertet që të hënën në mesditë kryen autopsinë.
“Vdekja e tij duket se ka ndodhur për shkak të asfiksisë por se di ka ardhur deri tek ajo mbetet të konstatohet nga ekspertët e mjekësisë ligjore”, i tha avokati Gazetës Express.
Ai ka hedhur poshtë raportimet se Dehari ka përdorur barna, apo substanca tjera.
“Astriti nuk ka përdorur barna e as substanca tjera, coftë edhe ato narkotike”, tha ai.
Avokati Gashi ka treguar se në obduksion që zgjati rreth dy orë e gjysmë përveç tre ekspertëve të Mjekësisë Ligjore, të kryesuar nga Flamur Blaka, kanë marrë pjesë edhe ekspertët e thirru nga familja Dehari Besim Ymaj nga Shqipëria dhe Besim Latifaj nga Anglia.
Astirt Dehari u gjet i vdekur në qelinë e tij në qendrën e paraburgimit në Prizren, fundjavën e kaluar. Ai po mbahej në këtë qendër si për sulmin e 4 gushtit në Kuvend, që u cilësua si sulm terrorist. Bashkë me Deharin, Policia e Kosovës, në shtator kishte arrestuar gjithsej 6 persona, të gjithë aktivistë të VV’së. /
