Kryebashkiaku i Durrësit Vangjush Dako ka deklaruar në një takim me banorë të Manzës se shërbimi dhe puna ndaj tyre do të jetë e njëjtë sic është bërë me qytetin e Durrësit. Dako është ndalur si fillim në infrastrukturën e qytezës së Manzës, për të cilën tha se ajo ka nevojë për rikualifikim në shumë aspekte dhe për këtë arsye puna do të nisë që në vitin e parë të mandatit.
“Ne do të transferojmë këtu modelin e zhvillimit të Durrësit dhe për të vazhduar edhe këtu një gjë të tillë kërkojmë votën tuaj në 21 qershor. Jemi të bindur dhe të vendosur për të ndërtuar një infrastrukturë moderne, ashtu sic e meritoni, pasi ju jeni të gjithë njëlloj, për ne asnjë banor i Durrësit nuk ka dallim nga tjetri” -tha kandidati i Aleancës për Shqipërinë Evropiane Vangjush Dako.
Dako tha se si fillim në Manëz do të ndërtohet rruga te lagjia e Repartit dhe më pas të gjitha rrugicat e tjera që në vitin e parë të mandatit të ardhshëm. Në krahasim me fshatrat e tjerë të bashkisë së re të Durrësit, Manza është më e avantazhuar, tha Dako, pasi ka shkollë të mesme, qendër shëndetësore, terrene sportive, por ne do ti modernizojmë më tej ato që të jenë në shërbim të qytetarëve dhe për rritjen e cilësië së jetës së tyre.
Godinat e komunave dhe bashkive do të qëndrojnë të hapura, ku do të vazhdojnë të funksionojnë zyrat e gjendjes civile, njëkohësisht në këto godina do të krijojme qendra komunitare sociale për shtresat në nevojë, pleq, gra ose fëmijë, shpjegoi Dako.
