Në takimin e zhvilluar në OKB, ministri i Jashtëm i Serbisë, Ivica Daçiç e quajti Kosovën vandaliste, sepse “ka shkatërruar monumentet e trashëgimisë kulturo-historike”. Me këtë akuzë ai ka kërkuar që të mos “shpërblehet me pranim në UNESCO”. Në fjalimin e tij të mbajtur në samitin e nivelit të lartë me temë “Mbrojtja e trashëgimisë kulturore – imperativ i njerëzimit”, Daçiq mbrëmë vuri theksin në vandalizmin, siç u shpreh ai, të Kosovës ndaj kësaj vlere për njerëzimin. Sipas tij, Serbia në Kosovë, si një territori i saj në bazë të Rezolutës 1244 nën administrimin e KB, ballafaqohet me vandalizëm që nga viti 1999.
“Në territorin e Kosovës e Metohisë shënjestër sulmesh kanë qenë 236 kisha, manastire e objekte të tjera në pronësi të Kishës Ortodokse Serbe, si dhe monumente kulturo-historike”, transmeton Koha.net raportimet e medieve të Beogradit, sipas të cilave Daçiq ka thënë se 61 sosh kanë statusin e monumenteve të kulturës, 18 janë posaçërisht të rëndësishme për shtetin e Serbisë.
Ai ka shtuar se janë shkatërruar 174 objekte fetare, 33 monumente kulturo-historike, janë vjedhur mbi 10 mijë ikona, objekte kishtare artistike e të adhurimit. Sipas tij, “posaçërisht shqetësuese është se mbi monumentet e mbrojtura të kulturës po shkruhen grafite që madhërojnë Shtetin Islamik dhe kalifatin e ardhshëm dhe kjo ndodh në kohën bashkësia ndërkombëtare po bën përpjekje aq të mëdha për të çrrënjosur këtë të keqe”.
“Pikërisht duke pasur për bazë rolin primar të UNESCO-s, si një organizatë që ka për qëllim e synim promovimin dhe mbrojtjen e trashëgimisë kulturore të njerëzimit, Serbia po bënë luftë diplomatike në mënyrë që aktet e shkatërrimit të qëllimshëm, sistematik dhe vandalist të trashëgimisë kulturore e historike në Kosovë e Metohi”, siç e quan Beogradi shtetin e pavarur të Kosovës, “të mos shpërblehen me anëtarësimin e Kosovës në UNESCO”, citohet të ketë thënë Daçiç.
