Anëtari i Komisionit të Sigurisë Kombëtare, deputeti socialist, Arben Çuko, i kërkon prokurorisë të zbardhë motivet që e kanë shtyrë deputetin e PD-së, Gent Strazimiri, që të shkojë me armë në protestën e PD-së tek Liqeni. Në një intervistë për “Shqiptarja.com” Çuko i kërkon prokurorisë t’i japë përgjigje pyetjes nëse deputeti demokrat kishte parashikuar të kryente vrasje në mes të protestuesve për t’ia faturuar atë më pas policisë. Çuko shprehet se nuk është i habitur nga fakti që deputeti demokrat mban armë, madje shkon edhe më tej, duke e cilësuar si një kamikaz që mund të kishte edhe tritol në trup gjatë protestës.
Sa i takon veprimit të policisë, deputeti socialist, Arben Çuko thotë se në momentin që deputeti u shfaq me armë, ai duhet të ishte ndaluar, pasi arma e tij tashmë konsiderohet pa leje, që prej 17 marsit, kur ka marrë njoftim nga Komisariati i Policisë së Shtetit.
