Po ndodh një gjë e pakuptimtë me koalicionin tashmë formal mes PS dhe LSI. Ndërkohë që kafet dhe takimet mes Ramës dhe Metës janë një kujtim i së shkuarës, gjuha është lëshuar dhe akuzat pasojnë njëra-tjetrën mes dy kampeve.
Megjithatë ajo që habit më shumë në këto orë është një rrethanë e pazakontë. Një ndër ato rrethana që të habit kur e sheh dhe dëgjon çfarë del nga goja e fushatistëve. Lëvizja Socialiste për Integrim ka paditur para dy ditësh kryeministrin Rama në prokurori, pas thirrjes që ai bëri ndaj punonjësve të policisë, që të mbledhin vota për PS pas orarit të punës.
Përtej faktit që Rama kërkoi menjëherë ndjesë për këtë lapsus, duke rënë dakort në distancë me deklaratën e Ministrisë së brendshme për rastin në fjalë, duhet thënë se LSI ka vijuar t’i mëshojë kësaj padie edhe në orët e fundit. Kryetari Vasili shpjegoi për mediat arsyet që kishin shtyrë LSI të bënte këtë hap, i cili duket thjesht si një gjetje elektorale, më shumë sesa si një premisë për të tërhequr Ramën në një aferë juridike.
Nga ana tjetër, paralelisht me këtë padi penale për kreun e qeverisë, LSI vijon të jetë pjesë e kabinetit Rama. Pra e qeverisë së drejtuar nga njeriu të cilin ata e kanë etiketuar si kreun e një organizate kriminale, si bos hashashi, si kryeministër bandash që duhet hequr me votë etjetj. Kjo sjellje e dyfishtë ka brenda shumë hipokrizi dhe falsitet. Nëse vazhdon të qëndrosh i ulur në një tryezë me një njeri që paska të gjiha këto krime mbi vete, dy janë arsyet përse kjo ndodh: ose nuk i ke seriozisht ato që thua në adresë të tij, ose kërkon të përfitosh edhe këto ditë që kanë mbetur për të shfrytëzuar zyrat, makinat, personelin e institucioneve që drejtojnë njerëzit e tu!
LSI është një parti e mësuar ndër vite, që të luajë me statuset e dyfishta. Edhe statusin e të qenit në qeveri, edhe me atë të të qenit në opozitë. Por në rrethanat aktuale, kur Ilir Meta i zgjedhur president bën thirrje për armatosjen e popullit kundër Ramës (a është kjo për t’u paditur në prokurori?), ndërkohë që ministrat e tij dhe qindra zyrtarë të tjerë të niveleve më të ulëta vazhdojnë të vulosin në emër të qeverisë së drejtuar nga Edi Rama, këtu ka diçka që nuk shkon. Në fakt ka më shumë sesa një gjë që nuk shkon. Është e gjithë paradigma e LSI që nuk shkon. Një parti që predikoi me fanatizem marrëveshjen pozitë-opozitë për muaj të tërë, e kur ka pa se mbeti jashtë kompromisit, “mori pushkën” kundër koalicionit ku ishte pjesë përfituese, më shumë sesa kontribuese./Javanews.al/
