Ministri i Shtetit për Çështjet Vendore, Bledar Çuçi, duke komentuar dy raportet e publikuara sot, atë të ‘Transparency International’, dhe atë të ‘The Economist Intelligence Unit’, sipas të cilave Shqipëria ka bërë progres, ftoi palët politike në vend të bashkëpunojnë për reformimin e sistemit të drejtësisë.
Duke e konsideruar reformën në drejtësi, si sfidën e vitit 2016, Çuçi tha se raporti i ‘The Economist Intelligence Unit’ citon se progresi është duke u mbajtur peng, nga grindjet politike mes qeverisë dhe partisë kryesore opozitare. “Gjej rastin t’i ftoj ti lëmë paragjykimet, të lexojmë me kujdes raportet që qartazi konfirmojnë për mungesë të progresit në reformimin e drejtësisë, duke e lënë këtë si një nga shqetësimet e Shqipërisë sot dhe duke e kthyer në sfidën më të madhe për vitin 2016”.
Ministri Çuçi u shpreh se Shqipëria, ndonëse renditet ende ndër vendet me demokraci hibride, përmendet si një nga vendet që ka shënuar progres në vitin 2015 duke arritur edhe pikëzimin më të lartë që nga vitit 2008. “Raporti thekson se Shqipëria ka bërë disa përparime në vitin 2015 që lidhen kryesisht me luftën kundër korrupsionit dhe luftën kundër krimit të organizuar. Po ashtu, sipas Çuçit, raportet dëshmojnë qartësisht se jemi në drejtimin e duhur për të mposhtur fuqinë e trashëguar të korrupsionit e për të fituar luftën për të çliruar shoqërinë tonë nga ky makth që pengon zhvillimin e minon demokracinë.
Ky rezultat pozitiv në indeksin e perceptimit të korrupsionit rikonfirmon vullnetin, vendosmërinë dhe seriozitetin e qeverisë në luftën kundër korrupsionit, vullnet i cili do të vazhdojë të përkthehet në thellimin e reformave të ndërmarra e në reforma të reja, në luftën për të bërë shtetin që zmbraps e tkurr korrupsionin”, deklaroi ministri. Reformat, u shpreh ai, kanë qenë e mbeten terapia e duhur kundër kancerit të korrupsionit që minon shtetin e ekonominë. Sipas tij, partneriteti publik-privat në të mirën e qytetarëve është një nga çelësat për të hapur dyert e shërbimeve cilësore dhe pa korrupsion për ta.
‘Transparency International’ ka publikuar këtë të mërkurë Indeksin e Perceptimit të Korrupsionit për vitin 2015, ku vihet re një përmirësim i lehtë në të dhëna për Shqipërinë.
Për vitin 2015, vendi ynë shënon 36 pikë, dhe renditet në vendin e 88-të nga 168 vende. Një vit më parë, Shqipëria kishte 33 pikë dhe renditej në vendin e 110, nga 175 vende ku është matur indeksi i korrupsionit.
Ndërsa po sot, Agjencia britanike e kërkimeve dhe analizave ‘The Economist Intelligence Unit’ ka publikuar indeksin e demokracisë për vitin 2015. Në këtë indeks ku janë në analizë 167 shtete, Shqipëria renditet e 81-ta me vlerësimin e përgjithshëm 5.91, duke u ngjitur 7 vende krahasuar nga një vit më parë.
