“Nëse ka dyshime për koncesione të veçanta, të hetohen dhe të anulohen, por jo të përfshihen të gjitha investimet, pasi kjo krijon imazh negativ tek investitorët e huaj”.
Kështu u shpreh sot gjatë një interviste televizive kreu i Dhomës Amerikane të Tregtisë, Marc Crowford, duke kërkuar nga politika që të mos përfshijë në debatet e veta biznesin.
Duke u ndalur te deklaratat e Partisë Demokratike se do të anulojë të gjitha koncesionet, Crowford theksoi se deklarata të tilla mund të krijojnë një imazh negativ tek investitorët dhe për rrjedhojë ta shohin klimën të papërshtashme për investime.
“Shqipëria duhet të jetë një sistem dhe nuk është një parti apo individ. Kur bëhet si sistem është më rehat për investitorët e huaj të vinë. Nëse ka ndonjë koncesion ku ka dyshime apo probleme të shikohet. Një më një, jo të gjithë. Po të themi do anulohen të gjithë, do të thotë se të gjithë janë të korruptuar dhe të gjithë nuk vlejnë. Nëse ambienti është ashtu, është vështirë për të tërhequr investitorët”, – theksoi Crowford.
Partia Demokratike prezantoi të hënën platformën kundër korrupsionit, ku deklaroi se janë 2.18 miliardë euro abuzime nëpërmjet kontratave të Partneritetit Publik Privat dhe koncesioneve.
/b.d
