Cristiano Ronaldo ka lëshuar një sulm të pakuptimtë kundër Islandës, skuadra debutuese në finalet evropiane, e cila frenoi Portugalinë në barazim 1-1. Marrja e një pike përballë një prej favoriteve do të ishte arsye feste për çdo debutues, por Ronaldo nuk e mendon kështu.
Ylli i Real Madridit i dha dorën vetëm njërit prej kundërshtarëve në përfundim të takimit dhe akuzoi Islandën se nuk u përpoq të fitonte.
“Kujtova se kishin fituar evropianin nga mënyra se si po festonin në fund, ishte e pabesueshme”, tha Ronaldo.
“Kur nuk përpiqesh të luash por vetëm mbrohesh, mbrohesh, mbrohesh, kjo, për mendimin tim, tregon mentalitet prej të vogli dhe ata nuk kanë për të fituar asgjë në këtë kompeticion. Ne u përpoqëm të bënim gjithçka, të mbanim topin gjithë kohën e të sulmonin, ata ishin vetëm mbrojtje, mbrojtje, mbrojtje dhe luajtën me kundrësulme. Ishin me fat, ne duhet të kishim marrë tri pikët, por s’ka problem”.
Portugalia kaloi në epërsi me Nanin, por Islanda barazoi me Bjarnasson.
“Shënuan një gol, krijuan dy raste në 90 minuta dhe pastaj u vunë të gjithë pas topit. Vunë autobusin para portës, kështu që ishte e vështirë”, thotë portugezi.
d.i.
