Franca numëroi një rekord 52,000 raste të reja të dielën, por ekspertët thonë se me shumë raste asimptomatike, numri i mundshëm është më i lartë.
Sipas mediave, këshilli shkencor vlerëson se ka rreth 100,000 raste në vend në ditë, tha presidenti i këshillit Jean-François DelFraissy të hënën në RTL Radio.
DelFraissy e përshkroi situatën e epidemisë si “shumë të vështirë, madje me gjasë kritike” në vend.
“Ne kishim parashikuar se do të kishim këtë valë të dytë, por ne vetë jemi të befasuar nga brutaliteti i asaj që ka ndodhur gjatë dhjetë ditëve të fundit”, shtoi ai.
Dhjetë ditë më parë, qeveria rivendosi një gjendje të jashtëzakonshme për të lejuar zbatimin e masave më të rrepta shëndetësore për të frenuar përhapjen e virusit.
Por shumë ekspertë thonë se vendi ka humbur kontrollin e epidemisë.
“Virusi është aq i pranishëm sa mendoj se sot nuk kemi ndonjë zgjidhje tjetër. Ne duhet të bllokohemi përsëri”, i tha dje France Info, Dr. Eric Caumes, shefi i shërbimeve infektive në Spitalin Pitié-Salpêtrière në Paris.
“Ne kemi humbur kontrollin e epidemisë disa javë më parë”, i tha Dr Caumes shërbimit publik të lajmeve.
Kështu vlerësohet se të paktën 46 milionë njerëz në Francë janë tashmë subjekt i një ndalimi pas orës 21:00, për të cilën Caumes tha se ishte një “bast i rrezikshëm” sepse nuk dihet nëse masa do të jetë efektive.
Mediat shkruajnë se ka gati 18,000 njerëz aktualisht të shtruar në Francë me COVID-19, një numër që ishte nën 10,000 vetëm dy javë më parë. Ka gjithashtu gati 3,000 njerëz aktualisht në njësitë e kujdesit intensiv.
Gjithashtu Franca ka numrin më të lartë të përgjithshëm të rasteve të regjistruara në Evropë me më shumë se 1.16 milion gjithsej që nga fillimi i krizës.
