Komisioni Europian u rekomandoi qeverive të BE-së hapjen e negociatave të anëtarësimit me Shqipërinë dhe Maqedoninë. Këtë e njoftoi përfaqësuesja e lartë për politikën e jashtme të BE-së, Federica Mogherini, gjatë një konference shtypi, ku paraqiti paketën vjetore për zgjerimin, shkruan sot gazeta italiane ”Corriere della Sera”.
Sipas Mogherinit, gjithashtu, përgjatë vitit të fundit edhe Mali i Zi dhe Serbia kanë bërë ”përparime pozitive” në negociata.
”Politika e zgjerimit është një investim për paqen, prosperitetin dhe stabilitetin e Europës”, theksoi Mogherini.
Disa zyrtarë në gjirin e BE-së shpresojnë që qeveritë e tyre t’i hapin rrugën Shqipërisë në kohën e duhur, për takimin në qershor të shefave të shteteve dhe qeverive, çka do ta shtynte Komisionin që të përshpejtonte procesin e integrimit të vendeve të Ballkanit Perëndimor.
Kjo, edhe pse presidenti francez, Emmanuel Macron nënvizoi se BE duhej të zgjidhte fillimisht problemet e qeverisjes së brendshme të unionit dhe pastaj të pranonte anëtarët e rinj.
Dosjet
Për të bindur Brukselin që të formulonte rekomandimin e tij për hapjen e negociatave me Shqipërinë, ishin hapat përpara të bëra nga Tirana, në veçanti në reformën e administratës publike dhe të drejtësisë, ku prej disa muajsh po zhvillohet procesi i vlerësimit të gjyqtarëve.
”Përparimet e Shqipërisë janë të prekshme dhe ajo që kemi parë është me të vërtetë premtuese”, deklaroi eurokomisioneri për Zgjerimin, Johannes Hahn, duke nënvizuar megjithatë se Tirana ”ka ende shumë për të bërë për të mbështetur këto përparime dhe për të thelluar aspektin reformist në sektorët kryesorë”.
Në vlerësimin e saj, BE vuri në dukje problemet me të cilat u përball vendi për shkak të polarizimit politik, mes tyre vonesa në reformën e drejtësisë.
Sot po shihen rezultatet e para pozitive, vazhdon dokumenti, që thekson se lufta kundër korrupsionit duhet të intensifikohet sepse vazhdon të paraqesë një problem në shumë fusha.
Kryeministri shqiptar
“Vlerësimi pozitiv i Brukselit është si rezultat i reformave dhe pikëpamjes së qeverisë time për të afruar Shqipërinë sa më pranë familjes së madhe europiane”, deklaroi drejtpërdrejt në televizion, pa fshehur emocionet, kryeministri Edi Rama.
“Jam i emocionuar sepse sot Shqipëria ka marrë vlerësimin më të lartë ndërkombëtar të thuajse një 30-vjeçari përpjekjesh, arritjesh dhe dështimesh, ngritjesh, rëniesh dhe ringritjesh”, shtoi Rama.
“Respekt dhe mirënjohje, për të gjithë ata që përpara nesh, kush më shumë e kush më pak, dhanë një dorë për të ndërtuar një pjesë të të vetmes rrugë të harmonisë shqiptare, rrugës drejt Bashkimit Europian”, nënvizoi ai.
“Europa nuk jep asgjë dhe Brukseli është një mekanizëm i pamëshirshëm që vlerëson vetëm meritën”, shtoi Rama./ATA
a.ç
