Menaxheri i Chelseat, Antonio Conte, ka pohuar se gjashtë ekipe janë ende në garë për titullin e Premier Ligës, edhe pse skuadra e tij është në krye të tabelës me nëntë pikë më shumë.
Italiani ka mohuar se gara për titull ka përfunduar, përkundër faktit se ata kanë siguruar 16 fitore dhe një humbje në 18 ndeshjet e fundit. Tottenhami mund të jetë gjashtë pikë prapa në kohën kur Chelsea do të takohet me Burnleyn, por Conte ka insistuar se Spurs, Arsenali, Manchester City, Liverpooli dhe Manchester Unitedi janë ende në garë për titull.
“Mendoj se deri në fund të këtij sezoni, ne do të kemi shumë presion. Besoj se edhe nëse luajmë para apo prapa ekipeve tjera, presioni do të jetë i njëjti nëse kundërshtari fiton pikë. Nëse kundërshtari nuk fiton, atëherë keni mundësi që të keni më shumë pikë. Kemi përvojë për t’u përballur me këso situata”, ka thënë Conte.
“Është e rëndësishme të mendojmë për vete. Për ne është e rëndësishme loja kundër Burnleyt, sepse e dimë se jemi në krye të tabelës dhe mund të llogarisim në lojën tonë. Pastaj nëse vijnë lajme të mira nga ekipet tjera, ne do të jemi të lumtur, por duhet të mendojmë për vete”, citohet Express. (b.an)
