Kryeministri ka qenë shumë i ashpër sot në paraqitjen e reformës së re për kthimin e kompensimin e pronave. Duke folur gjatë rreth kësaj nisme të re të qeverisë, Rama ka deklaruar ndër të tjera se “E gjithë historia që lidhet me pronën në Shqipëri është historia e një absurdi që ka pasur dy palë. Nga njëra anë inidividë që kanë arritur të trashëgojnë deri amfiteatro të antikitetit dhe nga ana tjetër një shtet dhe një qeveri që ka arritur të bëjë me pronën çorapin më të paimagjinueshëm në të gjithë historinë e pronës mes shtetit dhe indivdëve”.
Një detaj ky kurioz që të shtyn të gërmosh rreth konkretësisë së kësaj shprehjeje. Mësohet se kryeministri nuk ka folur në parim dhe as sa për ilustrim të deformimit të procesit të kthimit e kompensimit të pronës. Fjala është, sipas burimeve të mirëinformuara, për Amfiteatrin e Butrintit, i cili është tentuar të privatizohet nga një listë ish-pronarësh, të cilët kanë reklamuar të drejtën e pronësisë mbi atë zonë.
