Opozita mbetet e vendosur të mbajë të bllokuar parlamentin nëse nuk merret parasysh kërkesa e tyre për debat lidhur me Komisionin e Reformës Zgjedhore. Deputeti i PD Enkelejd Alibeaj e cilësoi të padrejtë përjashtimin e kreut të PD Basha nga punimet e Kuvendit ndërsa tha se “opozita aty do të qëndrojë”.
Ai tha se është e drejta e opozitës për debat, për të trajtuar para publikut sipas tij atë që ndodhi me votën në 25 Qershor. Deputeti thotë madje se u treguan ‘bujarë’ pasi i dhanë kohë mazhorancës.
“Ne u treguam bujarë me mazhorancën, u dhamë madje kohë deri në 4. Nuk pranuan dhe përjashtuan në mënyrë të padrejtë kryetarin e opozitës. Ky nuk është vend ku snajperat e Gramoz Ruçit t’i mbyllin gojën opozitës. Kërkojmë të drejtën tonë, e drejta e publikut të shprehemi se çfarë ka ndodhur në 25 Qershor”, tha Alibeaj./a.m.
