Automjeti tip fuoristradë, me targë AA 939 OY, në pronësi të 32-vjeçarit, ishte parkuar në anë të rrugës, pranë urës së Shënpjetrës, kur disa banorë kanë vënë re se ata ndodheshin të pajetë, raporton “Panorama”.
Policia mbërriti menjëherë në vendin e ngjarjes pas sinjalizimit të dhënë dhe konstatoi se i riu ishte vetëvrarë pasi kishte qëlluar më parë për vdekje me plumb në kokë vajzën që ndodhej bashkë me të në makinë.
Paraprakisht ky është versioni i dhënë nga Policia e Fierit, por, sipas Policisë, ngjarja është duke u hetuar pa përjashtuar as pistën e një vrasjeje të mundshme të tyre.
NGJARJA
Kanë qenë kalimtarë të rastit ata që kanë vënë re trupat e pajetë brenda automjetit rreth orës 11:30. Fillimisht është menduar se dy të rinjtë ishin familjarë dhe se mund të ishin ekzekutuar nga persona të tjerë.
Pas mbërritjes së Policisë dhe këqyrjes së vendit, ngjarja dyshohet si vrasje dhe më pas vetëvrasje. Burime nga grupi hetimor bënë të ditur se dallohet qartë që viktima Drini Derveni, pasi ka qëlluar me armë vajzën, ka vrarë edhe veten.
Policia konfirmoi se 32- vjeçari në çastin që viktimat janë gjetur në makinë, mbante në dorë një pistoletë të tipit “TT”.
Sipas ekspertëve në vendngjarje, edhe pse ende nuk ka dalë ekspertizë mjekoligjore, të dhënat tregojnë se Derveni e ka qëlluar pas koke të dashurën e tij dhe fill pas kësaj ai ka puthitur tytën e pistoletës në anën e djathtë të kokës, duke u vetëvrarë./panorama/a.m.
