Sudani aktualisht është shndërruar në një vend ku po mbizotëron lufta, përdhunimet, vrasjet makabre dhe era e të vdekurve. Gjithsej janë raportuar 70 raste përdhunimi dhe numërohen 100 të vrarë. Në këto kushte, lufta civile pritet të ndodhë shumë shpejt.
Kush po e shkatërron Sudan-in? Milicia, e cila çdo ditë e më shumë po lufton në mënyrë të frikshme ndaj civilëve.
Qytetarët e këtij vendi afrikan kanë filluar protestën e tyre në dhjetor të vitit 2018-të kundër ish-presidentit Hassan al-Bashir, i cili dha dorëheqjen më 11 prill 2019.
Të paktën 19 fëmijë radhiten në listën e të vdekurve dhe qindra të tjerë janë abuzuar seksualisht nga milicia vendase. I tmerrshëm është fakti se era e trupave të vdekur është shpërndarë në gjithë vendin, kryesisht në shkolla.
Milicia është ajo e cila ka marrë pushtetin në dorë dhe po kryen akte të frikshme ndaj njerëzve që ndodhen në Sudan. Në këtë pikë, demonstruesit e pro-demokracisë po protestojnë që pushteti t’i dorëzohet civilëve dhe makthi për sudanezët të marrë fund njëherë e mirë.
Por pavarësisht protestave të njëpasnjëshme, duket se çdo gjë mbetet në vendnumëro. Dhjetëra ushtarakë janë vrarë dhe shpresa dita-ditës po zbehet e frika po rritet. 100 protestues kanë mbetur të vdekur ndërsa 700 persona të tjerë janë plagosur.
26-vjeçari Mohamed Mattar, i cili ka studiuar në Londër është vrarë në protestë. Ai u qëllua teksa po mbronte gratë nga milicia sudaneze. Në shenjë solidariteti, kudo në mediat sociale njerëzit po shpërndajnë në profilet e tyre një foto blu, e cila ishte ngjyra e preferuar e Mohamed-it.
Forcat për Deklarimin e Lirisë dhe Ndryshimit, e cila përfaqëson kërkesën e protestuesve për sundimin civil, u bëri thirrje njerëzve të kthehen në punë në Sudan, pas grevës së përgjithshme tre-ditore. Vendimi i tij përmirësoi dukshëm situatën duke shmangur përshkallëzimin e mëtejshëm të protestave dhe dhunës.
“Ne jemi optimistë se negociatat do të rifillojnë dhe gjërat do t’i kthehen normalitetit dhe do të arrihet një marrëveshje”, është shprehur Yousef Hassan, një mësues nga Khartoum-i.(TT News)/l.m
