Dy rasteve të vetëvrasjes së dyshuar të drejtuesve të lartë të industrisë ruse të gazit, i është shtuar edhe dyshimi i lidhjes me dy raste të tjera të ndodhura më herët gjatë vitit.
Dy biznesmenë të pasur u gjetën të vdekur së bashku me anëtarët e familjeve të tyre këtë javë në Madrid dhe Moskë, por tani po ngrihen dyshime për dy figura të tjera të lidhura me Kremlinin që vdiqën në fillim të këtij viti, raportoi DailyMail.
Të martën, trupi i Sergey Protosenya, 55 vjeç, u gjet i varur jashtë një vile spanjolle, me gruan e tij Natalia, 33, dhe vajzën e tyre adoleshente Maria, të gjetur të vrarë me sëpatë brenda.
Por raportet lokale thanë se provat nuk tregojnë përfundimisht drejt këtij shpjegimi, pasi nuk u gjet asnjë shënim vetëvrasjeje në pronë dhe dukej se ishin ndërmarrë hapa për t’u siguruar që nuk kishte gjurmë gishtash në armët e vrasjes.Biznesmeni kishte shërbyer si nënkryetar i kompanisë së gazit natyror Novotek, një kompani e lidhur ngushtë me Kremlinin.
Vetëm disa ditë më parë, trupi i Vladislav Avayev, 51 vjeç, u gjet në apartamentin e tij elitar në Moskë së bashku me gruan e tij Yelena, 47 vjeçe dhe vajzën e tyre Maria, 13 vjeç, në një tjetër vrasje-vetëvrasje të dukshme.
Avayev ishte më parë zëvendës president në Gazprombank – një bankë që u krijua për të punuar për gjigantin rus të gazit Gazprom, dhe gjithashtu kishte qenë një zyrtar i Kremlinit.
Në të dyja rastet ka dyshime se vdekjet mund të jenë inskenuar si vetëvrasje, por detektivët janë ende duke hetuar.
“Dy incidentet makabre bashkohen nga vendet e mëparshme të punës së viktimave, të dyja janë të lidhura me rrethin e brendshëm të Putinit dhe të dy kanë humbur jetën bashkë me familjet” , sipas kanalit Telegram Mozhem Obyasnit.
Por ka edhe dy vdekje të tjera të drejtuesve të njohur të industrisë së gazit këtë vit, të cilat kanë ngjallur dyshime.
Më 25 shkurt, një ditë pas fillimit të luftës në Ukrainë, trupi i Aleksandër Tyulakov, 61 vjeç, një zyrtar i lartë financiar dhe sigurie i Gazprom në nivel zëvendësdrejtor të përgjithshëm, u zbulua nga e dashura e tij.
Ai ishte varur në shtëpinë e tij prej 500,000 £. Megjithatë, raportet thonë se ai ishte rrahur keq pak para se “t’i merrte jetën vetes”, siç u pretendua.
Në rajonin e Leningradit tre javë më parë, u gjet edhe Leonid Shulman, 60 vjeç, shef i transportit në Gazprom Invest, i cili u gjet i vdekur me plagë të shumta me thikë në një pellg gjaku në dyshemenë e tij të banjës.
Në skenën e krimit u gjet një shënim, përmbajtja e të cilit nuk është bërë e ditur dhe Komiteti Hetimor Rus thuhet se refuzoi të diskutonte mbi rastet.
Lidhja me Vladimir Putin
Inxhinieri dhe ekonomisti Protosenya kishte qenë llogaritari kryesor i kompanisë Novatek, prodhuesi më i madh i pavarur i gazit natyror në Rusi, midis 2002 dhe 2014, dhe më vonë zëvendës president.
Novatek është në bashkëpronësi të mikut të ngushtë të Putinit, Gennady Timchenko dhe gjigandi i gazit ishte përjashtuar kohët e fundit nga urdhri i liderit të Kremlinit për të tregtuar energjinë vetëm në rubla.
Kompania është gjithashtu e lidhur ngushtë me Pyotr Kolbin, një mik i fëmijërisë së Putinit, që dyshohet se ishte një mbajtës në hije e pasurisë së Putinit.
Ish-punëdhënësi i Avayev, Gazprombank, shihet gjithashtu si i afërt me rrethin e Putinit dhe dyshohet se përdoret nga presidenti dhe të afërmit e miqtë e tij.
Gazprombank u zgjodh nga Putin si i autorizuar për të marrë pagesat perëndimore për gazin në rubla.
Gazprombank është një nga kanalet kryesore për pagesat për naftën dhe gazin rus, dhe në mars, Putini kërkoi që vendet e huaja të hapnin llogari në bankë në mënyrë që të paguanin gazin rus – si hakmarrje ndaj sanksioneve perëndimore.
Gazprombank më pas do të konvertonte euro ose dollarë në rubla.
Novatek, prodhuesi i dytë më i madh rus i gazit natyror, ka qenë gjithashtu subjekt i sanksioneve perëndimore që kur Putin filloi pushtimin e tij në Ukrainë. BW
