Nëse SPAK paraqet një kërkesë për arrestimin e një deputeti apo anëtari të Këshillit të Ministrave, si në rastin e Ballukut, procedura është e përcaktuar qartë në Rregulloren e Kuvendit, konkretisht në nenet 118 dhe 119.
Hapi i parë, kërkesa shkon te Kryetari i Kuvendit
Kërkesa për caktimin e masës së sigurimit “arrest në burg” ose “arrest në shtëpi”, apo për çdo formë tjetër të heqjes së lirisë, i paraqitet Kryetarit të Kuvendit nga prokurori i SPAK. Kryetari i Kuvendit e përcjell menjëherë kërkesën për shqyrtim në Këshillin për Rregulloren, Imunitetin dhe Mandatet dhe vë në dijeni deputetin për të cilin është bërë kërkesa.
Njoftimi dhe e drejta e mbrojtjes
Deputeti njoftohet zyrtarisht për kërkesën dhe dokumentet shoqëruese, si edhe për datën kur Këshilli do të nisë shqyrtimin. Ai ka të drejtë të japë shpjegime me shkrim ose me gojë, të përfaqësohet nga mbrojtës ligjor, të bëjë pyetje dhe të kërkojë sqarime, në funksion të ushtrimit të plotë të së drejtës së mbrojtjes.
Raporti i Këshillit
Pas shqyrtimit, Këshilli për Rregulloren, Imunitetin dhe Mandatet ka afat deri në dy javë për të hartuar raportin, ku rekomandon miratimin ose rrëzimin e kërkesës së SPAK. Ky raport u shpërndahet të gjithë deputetëve.
Seanca plenare dhe votimit
Kërkesa për arrestim vendoset si pikë e parë e rendit të ditës në seancën plenare pasardhëse. Fillimisht fjalën e merr deputeti ndaj të cilit është paraqitur kërkesa. Raporti i Këshillit nuk diskutohet. Në fund, Kuvendi vendos me votim të hapur për dhënien ose jo të autorizimit për arrestim apo masë tjetër sigurimi.
Afati maksimal, 3 muaj
Nëse Kuvendi nuk merr një vendim brenda tre muajve nga paraqitja e kërkesës, atëherë kërkesa konsiderohet e rrëzuar automatikisht.
Zbatim edhe për anëtarët e qeverisë
Sipas nenit 118, e njëjta procedurë zbatohet edhe për anëtarët e Këshillit të Ministrave që kanë status deputeti.
Rasti i arrestimit në flagrancë
Nëse deputeti arrestohet pa autorizim, në kryerje e sipër ose menjëherë pas kryerjes së një krimi të rëndë, SPAK njofton menjëherë Kryetarin e Kuvendit. Këshilli mblidhet urgjentisht dhe brenda 48 orëve harton raportin, ndërsa seanca plenare thirret po brenda këtij afati për të marrë vendimin përfundimtar.
Kjo është rruga institucionale që ndjek Kuvendi në çdo rast kur SPAK kërkon arrestimin e një deputeti apo ministri, duke balancuar hetimin penal me garancitë kushtetuese të mandatit parlamentar.
