Në fund të marsit, drejtuesit ushtarakë amerikanë dhanë urdhër që, në fazat e ardhshme të fushatës ushtarake kundër Iranit, të përdoret pothuajse i gjithë arsenali i raketave të fshehta me rreze të gjatë veprimi Jassm-Er, duke i marrë ato edhe nga depot e destinuara për rajone të tjera. Këtë e raporton Bloomberg, duke cituar një burim anonim.
Nga disa struktura amerikane, përfshirë edhe ato në territorin e SHBA-së, raketat do të transferohen në bazat e Komandës Qendrore të Shteteve të Bashkuara ose në Fairford, në Mbretërinë e Bashkuar. Pas këtyre zhvendosjeve, vetëm rreth 425 raketa Jassm-Er – nga një arsenal prej rreth 2.300 para luftës – do të mbeten të disponueshme për misione të mundshme në pjesën tjetër të botës.
Çfarë janë raketat Jassm-Er
Jassm-Er janë raketa ajër-tokë me rreze të gjatë veprimi; ato mund të fluturojnë mbi 965 kilometra dhe janë projektuar për të goditur objektiva nga distanca më të sigurta, duke shmangur mbrojtjen ajrore të armikut. Në këtë mënyrë, ato ulin rrezikun për personelin ushtarak.
Sipas rindërtimit të Bloomberg, së bashku me versionin me rreze më të shkurtër Jassm (me rreze rreth 400 kilometra), rreth dy të tretat e rezervave amerikane janë përdorur në luftën kundër Iranit. Operacionet amerikane gjatë katër javëve të para të luftës kanë konsumuar mbi një mijë raketa Jassm-Er, sipas një burimi të dytë të cituar nga Bloomberg.
Stoqet e armëve me rreze të gjatë përbëjnë një problem që nga fillimi i luftës: për t’i zëvendësuar ato të përdorura do të nevojiten shumë vite prodhimi, në ritmet aktuale. Sipas disa analistëve, përdorimi i gjerë i këtyre armëve në sulmet ndaj Iranit ka ulur rezervat e sistemeve të destinuara për kundërshtarë më të fortë, si p.sh. Kina.
Ndërkohë, Shtetet e Bashkuara dhe Izraeli kanë deklaruar se kanë shkatërruar një pjesë të konsiderueshme të mbrojtjes ajrore iraniane, gjë që u ka lejuar të përdorin edhe armë më të lira për të goditur objektiva në vend.
Lufta mund të hyjë kështu në një fazë të re, edhe më të ashpër, pas tensioneve të fundit në ngushticën e Hormuzit dhe kërcënimeve të Donald Trump ndaj Teheranit, një ditë pas operacionit amerikan për shpëtimin e dy pilotëve të mbetur të izoluar në Iran pas rrëzimit të avionit të tyre./ Corriere della Sera
