Nga Romeo Karaj
Janë të shumtë personat të cilët më pyesin se çfarë vendimi do të marrë komisioni parlamentar për investigimin e privatizimit të OSSH. Është një pyetje që më shqetëson edhe vetë mua.
Populli dhe unë si pjesë e tij presim që vendimi i komisionit të jete hapi i duhur ligjor për zbardhjen dhe futjen e çështjes në binarët e duhur.
Sipas meje dhe specialistëve më të mirë të këtij vendi, vendimi më i mirë i këtij komisioni do të ishte krijimi i një task force me prokurore dhe OPGJ me detyrën e investigimit të hollësishëm dhe fillimin e çështjes penale përkundrejt keqbërësve ish qeveritarë.
Si vendim duket i thjeshtë dhe i logjikshëm, por po të paramendosh se si do zbatohet në realitet ngritja dhe funksionimi i një task force të tillë, atëherë kupton se për momentin kjo gjë është e pamundur.
Si dhe kush do të zgjedhë prokurorët?
A është kjo prokurori aq e pastër dhe aq e pavarur sa të realizojë këtë mision?
Nuk po flas për të gjithë prokurorinë, por po marr shembull vetëm atë të Tiranës. Është një prokurori tërësisht e pabesueshme dhe nën ndikimin e të gjithë berishajve.
Mjafton të përmendim se shefja e sektorit antikorrupsion në këtë prokurori është Deniona Katro, njeri i afërt i Argita Berishës.
Për të mos folur pastaj për drejtuesin e prokurorisë së Tiranës, Petrit Fusha. Ai së bashku me prokurorin Ardian Braho, dekonspiruan takimin me avokatët e Clifford Chance të mbajtur në zyrën e tyre tek Kastriot Ismailaj në vjeshtë 2013.
Në fillim të vitit 2014 Ismailaj dorëzon një parashtrim ne arbitrazhin e Vjenës ku për turp të të gjithë neve shihej se si zyrtarët e këtij shteti, në kundërshtim me çdo lloj norme dhe etike profesionale shisnin informacione dhe merrnin përsipër të dëshmonin edhe vetë në arbitrazh pro Ismailajt dhe ne dëm të shtetit.
Në parashtrime nuk përmendeshin emrat, por të gjitha detajet e bisedës së bërë në zyrën në fjalë, se nga kush u servir ky informacion, nuk ka më dyshim.
Për arsyen e mësipërme u rrezikua totalisht pozita jonë në arbitrazh si dhe u kërkua heqja e licencës së avokatit kryesor, Tim Schreiber.
Po nga kjo prokurori u shty deri në limite arrestimi i Ismailajt dhe për çudi, ditën që arrestohet, i jepet vërejtje prokurores që e arrestoi.
Duke parë situatën mendoj se strukturat për zbardhjen dhe çuarjen deri në fund të kësaj çështjeje nuk janë gati.
Përkundrazi kjo prokurori qëndron si garanci e ish-pushtetarëve të inkriminuar në këtë aferë.
Ata kanë vetëm një rrugë; të dëmtojnë provat që janë, të pengojnë marrjen e provave të reja si dhe të bëjnë të pabesueshëm dëshmitarët e mundshëm.
Kjo prokurori do të fillojë gjuetinë e shtrigave sipas kërkesave karshi çdo personi që përballet me ish-pushtetarët hajdutë të kësaj afere.
Kjo do të jetë beteja e ardhshme.
