Zgjidhje urgjente për çështjen e targave ka kërkuar emisari i BE-së për dialogun Kosovë – Serbi, Miroslav Lajçak gjatë takimit me kryenegociatorin e Kosovës, Besnik Bislimi në Bruksel.
Lajçak në postim në Twitter ka thënë se është e papranueshme një përshkallëzim në terren.
“Po diskutojmë për krizën aktuale në marrëveshjet mes Kosovës dhe Serbisë, veçanërisht çështjen e targave. Ne urgjentisht duhet të gjejmë zgjidhje për të garantuar sigurinë dhe stabilitetin në terren. Çdo eskalim apo dhunë është e papranueshme”.
Bashkimi Evropian ndërkohë është duke u angazhuar edhe për një takim Kurti-Vuciç para 21 Nëntorit kur edhe pritet të hyjë në fuqi vendimi që të gjobiten qytetarët me targa ilegale serbe në Kosovë.
Ndërkohë, Lista Serbe ka refuzuar të marrë pjesë në zgjedhjet e jashtëzakonshme në katër komunat veriore e të cilat do të mbahen më 18 Dhjetor.
“Duam të informojmë publikun se Lista Serbe nuk do të marrë pjesë në këto zgjedhje, e as qytetarët që e përkrahin partinë tonë, nga të cilat mbi 95% janë në këto m hapësirave”, thuhet në komunikatën e Listës Serbe.
Drejtori i të ashtuquajturës Zyrë për Kosovë në Qeverinë e Serbisë, Petar Petkoviç, deklaroi se zgjedhjet lokale të shpallura në veri të Kosovës, janë vazhdimësi e dhunës ligjore dhe institucionale ndaj serbëve.
Të hënën, Presidentja e Kosovës, Vjosa Osmani, mori vendim që zgjedhjet në veri të mbahen më 18 Dhjetor pas dorëheqjes se katër kryetarëve serbë të 4 komunave.
/a.r
