Kryetarja e Lëvizjes Socialiste për Integrim, Monika Kryemadhi, ka reaguar pas denoncimit të një punonjësi policie, që thotë se djali i një deputeti socialist ka përdhunuar një vajzë jetime dhe atij i kanë vënë pistoletën në kokë, që të mbyllin çështjen.
Ajo thotë se viktimë ishte një vajzë jetime ndërsa shton më tej se fatin e asaj vajze mund ta ketë kushdo.
“Sot ka ndodhur një skandal tjetër i radhës.
Një ish-oficer i policisë gjyqësore ka denoncuar se si ditën për diell në mes të komisariatit të policisë Fushë Krujë i është vendosur pistoleta në kokë për të mos pranuar kallëzimin e një vajze të re, jetime, e cila ishte rrëmbyer dhe përdhunuar nga djali deputeti.
Kjo është shumë e rëndë.
Unë mezi pres nga këto shoqatat për të drejtat e grave, të cilat bëjnë projekte pa fund, mezi po pres të shikoj gjithë ato personazhe publike që flasin në televizione ndaj dhunës ndaj grave, mezi pres deklaratat e tyre në përkrahje të kësaj vajze, e cila është jetime, e cila e ka të pamundur mbrojtjen e saj nga familjarët, e cila ka qenë viktimë e dhunës apo epsheve të një djali socialisti, më të përkëdhelur se ç’duhet.
Më e tmerrshmja është që pistoleta në kokë i vihet në prezencë të kryetarit të Bashkisë dhe të një deputeti, kolegut tonë.
Ky vend është kthyer në një bandë. Njerëzit do të vendosin vetëgjyqësi.
Sot e bëjnë me një vajzë që nuk ka babain, por nesër mund ta bëjnë me fëmijët tanë”, tha ajo./a.m.
