Rekrutët që vendosën të bashkohen me FA-në, janë betuar sot në një ceremoni në shkollën e Trupës në Bunavi në një ceremoni për çertifikimin e tyre.
Zv.ministri i Mbrojtjes, Petro Koçi, në fjalën e tij e cilësoi një ditë e veçantë dhe krenarie, e cila nuk përsëritet më, pavarësisht nga karriera që do bëjë gjithsecili nga ushtarakët.
“Ju sot i garantoni Shqipërisë por edhe NATO-s se do të jeni në krye dhe në lartësinë e detyrës, jo vetëm për të ruajtur integritetin e vendit tonë, jo vetëm kur të jetë në rrezik popullsia e vendit, por edhe për të qenë të gatshëm për t’i shërbyer paqes dhe stabilitetit në botë”, u shpreh ai.
Koçi e vuri theksin tek fakti që kjo është një ditë krenarie edhe për ata që bëhen pjesë e një strukture që është më e pastra, më e mira dhe më transparentja në Republikën e Shqipërisë. “Mund t’ju kujtoj që vetëm ditët e fundit në sondazhin e kryer nga institucioni IDRA, i cili bën sondazh për antikorrupsionin dhe për transparencën e veprimtarisë shtetërore, një projekt i financuar nga SHBA ka evidentuar konkluzionin e qartë se Ministria e Mbrojtjes dhe FA-të janë në krye të besueshmërisë për transparencën në veprimtarinë e tyre”, nënvizoi Koçi.
Kryetari i Bashkisë së Vlorës, Dritan Leli, e konsideroi ditën e sotme, si një nga ditët më emocionuese të punës së tij, pasi këta rekrutë kanë zgjedhur të japin edhe atë që është më e shtrejnta për njeriun, vetë jetën.
Në këtë ceremoni, u çertifikuan në total 342 ushtarë/ detarë, nga të cilët 321 ushtarë/ detarë të parë, 21 ushtarë/ detarë të dytë. 23 nga të cilët ishin femra. Të 342 rekrutët përfunduan stërvitjen individuale bazë 10 – javore dhe titullohen ushtarë aktiv me gradën ushtar i I-rë dhe ushtar i II-të për ata me arsim të lartë. Në fund të ceremonisë u shpërndanë edhe çertifikata për rekrutët më të dalluar. (java / r.a)
