Drejtoresha e Agjencisë së Zhvillimit Bujqësor Rural, Frida Krifca ishte sot në Cërrik, në një nga shtatë fermat bujqësore që tre vëllezër kanë ngritur e menaxhojnë me sukses, aty ku deri dje ishin toka djerrë.
Përveçse tregtarë të suksesshëm të shegës, arrës, kivit e ullinjve, ata kanë ngritur edhe linjën e tyre të prodhimeve të bulmetit dhe shitjes së tyre në tre dyqane me emrin “Bullari Natyral”.
Krifca tha se vëllezërit Bullari kanë 7 vite që merren me bujqësi dhe blegtori dhe zotërojnë rreth 250 ha tokë të mbjellë të gjithën me pemishte të ndryshme.
“Jemi në një plantacion prej 7 ha me arrë që është në vitin e 5-të të prodhimit. Lulzimi është aplikant në programin IPARD për një plantacion prej 32 ha për bajamet”, tha Krifca.
Ajo theksoi se vëllezërit Bullari janë përfitues nga skema kombëtare e mbështetjes vit pas viti dhe kanë përfituar 7 herë me një shumë prej 1.4 milionë lekë të reja.
Ajo i ftoi ata që të aplikojnë edhe në programin IPARD, në masën 1 “Investime në fermë”.
Ndërkohë Lulzim Bullari u shpreh se biznesin e kanë hapur në vitin 2000 pas kthimit nga emigracioni. “Bëmë studim se çfarë mund të mbjellim dhe ishte arra, kivi, bajame. Këtu kemi rreth 42 ha arra, 14 500 rrënjë arra. Çdo vit kemi bërë aplikim dhe i kam marrë ato para. Ne kemi krijuar një aktivitet me cikël të mbyllur, pasi kemi edhe fermën, edhe baxhon tonë ku prodhojmë rreth 300 kg djathë në ditë”, tha ai.
