David Cameron theksoi se duhen ende dekada përpara konkretizimit të anëtarësimit të Turqisë në Bashkimin Evropian, në përgjigje të mbështetësve të tezës “Brexit” që nxitën kërcënimin e një vale të re migratore drejt Britanisë së Madhe.
“Ky proces do të marrë ndoshta dekada, përpara se të gjendemi përballë këtij fakti të mundshëm. Turqia paraqiti kandidaturën e saj për anëtarësim në vitin 1987. Me ritmin sesi po avancojnë procedurat, duhet të presim vitin 3000 për të konkretizuar anëtarësimin e saj në Bashkimin Evropian”, u shpreh kryeministri britanik në platformën e stacionit televiziv ITV.
Cameron i cili po propagandon për qëndrimin e Britanisë së Madhe në BE, u përgjigj në këtë formë ndaj përkrahësve të “Brexit”, një muaj nga organizimi i referendumit më 23 qershor, të cilët e renditën anëtarësimin e Turqisë në epiqendrën e debatit.
“Dymbëdhjetë milionë shtetas turq u shprehën se dëshirojnë të vijnë në Britaninë e Madhe, të cilët përbëjnë kryesisht shtresën e të papunëve dhe të studentëve, u bë kryefjala e Sunday Express, një tabloid mbështetës i partisë anti-imigracion Ukip.
