Silva Caka, sekretare për marrëdhëniet me publikun në Partinë e Lirisë tha se kjo qeveri sipas saj e korruptuar mund të rrëzohet nëse të gjithë luajnë rolin e tyre, që nga opozita, qytetarët dhe media.
Caka u shpreh se shtatori pritet të sjellë ndryshime pasi represioni i kësaj qeverie ndaj qytetarëve ka arritur kulmin dhe opozita nuk është më e shitur siç ka qenë deri tani.
“Secili duhet të luajë rolin e vet, qytetarët duhet të mbështesin protestat, një mjet pë të rrezuar qeverinë janë edhe protestat, mediat duhet të investigojnë për denoncimet përditë për inceneratorët; vazhdojnë të paguajnë për inceneratorët edhe pse një pjesë janë konfiskuar. Nëse të gjithë reagojmë dhe marrim hapa konkrete s’e ka të gjatë kjo qeveri që është e zhytur në korrupsion”, tha Caka.
Ajo vlerësoi Monika Kryemadhin si një nga figurat qendrore të LSI dhe Partisë së Lirisë, ndërsa tha se opozitarizmi i Kryemadhit ishte naiv karshi opozitës së shitur të Bashës.
“Nuk duhet të hidhnim poshtë ato figura që i kanë qëndruar edhe në ditët më të vështira të LSI. Opozitarizmi i Kryemadhit ishte naiv karshi opozitës së shitur të Bashës. Nga ana tjetër ishte edhe solidaritet me aleatët, unë e shoh si vlerë”, tha Caka teksa shtoi se nuk ishte dakord me largimin e Kryemadhit nga drejtimi i LSI pa mbajtur një fjalë.
/a.r
