Seleksionuesi U-21 i Austrisë në futboll Werner Gregoritsch nuk ka fije dyshimi se mesfushori kosovar Sinan Bytyçi do të kishte arritur për dy vjet deri te përfaqësuesja A e Austrisë.
Por Bytyçi 21-vjeçar ka vendosur që të përfaqësojë Kosovën.
Të enjten Bytyçi ka marrë lejen nga FIFA për të luajtur për Kosovën, ndërsa ai pritet të aktivizohet për Kosovën në ndeshjen e parë eliminatore për Botërorin 2018 në Rusi që përfaqësuesja e zhvillon të hënën në Turku kundër Finlandës, përcjell Koha Ditore.
“Unë besoj se tek ne për një apo dy vjet do të ishte kandidat për Përfaqësuesen A, po të kishte vazhduar me këtë ritëm.
Por në Kosovë është ngjallur një krenari e re nacionale, ai gjendet në Përfaqësuesen A atje. Për të është një gjë fantastike. Duhet respektuar vendimi i tij”, ka thënë Gregoritsch për “Laola1.at” të enjten.
“Ai më ka shkruar një SMS të bukur. Ai më ka falënderuar, që ka pasur mundësinë të luajë për U-21, e ka shijuar këtë dhe ka thënë se për të ishte një nder”…(b.an)
