Deputeti demokrat njëherësh dhe bashkëhartues i Kodit Zgjedhor, Oerd Bylykbashi duke folur për Reformën Zgjedhore, ka parashtruar disa nga kërkesat e opozitës, duke u ndalur më së shumti te votimi elektronik.
I ftuar në rubrikën “Opinion”, në News 24, Bylykbashi tha se demokratët kërkojnë futjen e teknologjisë në votim, në mënyrë që siç tha ai, tu hiqet çdo mundësi kriminelëve zgjedhorë.
“Ne kërkojmë futjen e teknologjisë në votim, identifikimin biometrik të zgjedhësve. Nuk do ketë njerëz që të votojnë për të tjerë. Votimi do të jetë absolutisht i pandikueshëm në aspektin e rezultatit dhe mbi të gjitha për të nxjerrë një rezultat na duhen një javë -10 ditë, kështu rezultati del brenda ditës. Votimi elektronik do të jetë një ndryshues loje aq i madh sa do tu heqë çdo mundësi kriminelëve zgjedhore”- deklaroi Bylykbashi.
Sipas deputetit demokrat, reforma zgjedhore duhet të prodhojë një parlament që të përfaqësojë denjësisht shqiptarët.
“Një pjesë e sistemit të drejtësisë në të ardhmen vjen nga parlamenti. Parlamenti duhet të jetë i pahapur nga krimi siç është sot për fat të keq. A do të ishte më mirë që një reformë zgjedhore të na prodhonte një parlament që të përfaqësonte denjësisht shqiptarët. Zgjedhjet janë për pak më shumë se një vit. Nuk është çështje e ndryshimit të kodit zgjedhor. Është çështje veprimi që duhet të bëjnë institucionet e tjera. Ministria e Brendshme nuk bën regjistrin e adresave, që është themelor për saktësinë e listave të zgjedhësve”- tha Bylykbashi.
Lidhur me vendimin e Kushtetueses për heqjen e mandatit të deputetit Koço Kokëdhima, Bylykbashi tha: “E rëndësishme është që sot në Ditën e Europës dhamë një model të fitores së kushtetueses mbi kusarinë e kësaj maxhorance”./a.m.
