Ministri i Punëve të Jashtme, Ditmir Bushati deklaroi të premten nga Varshava se “vëmendja më e madhe e NATO-s kushtuar rajonit, përfshirë bashkëpunimit me Kosovën, përbën një element inkurajues për proceset integruese në këtë kënd të Europës”.
Pjesë e delegacionit shqiptar që po merr pjesë në punimet e samitit të NATO-s në Varshavë, Ministri Bushati deklaroi për mediat se “angazhimet e ndërmarra para dy vitesh në Wales janë konkretizuar”. “Shqipëria ka kontribuar si asnjëherë tjetër në masat për të fuqizuar mbrojtjen kolektive si dhe në kuadër të përballimit të rreziqeve që burojnë nga jugu i Aleancës”, deklaroi Bushati.
Ai theksoi se “prioriteti ynë mbetet eliminimi i zonave gri në Ballkanin Perëndimor”. “Siguria brenda Aleancës lidhet ngushtë me sigurinë jashtë kufijve të NATO-s”, shtoi Bushati.
