Ministri i Punëve të Jashtme, Ditmir Bushati, duke folur në ministerialin e NATO-s tha se vendi ynë ka rritur investimet për modernizimin e Forvave të Armatosura.
Sipas tij, vëmendja e NATO-s është thelbësore për rajonin ndërsa deklaratat e ministrit janë bërë në rrjetin social Facebook.
“Bisedime frytdhënëse në ministerialin e NATO-s në Bruksel në përgatije të Samitit të muajit maj. Rikonfirmuam rëndësinë e Aleancës transatlantike, ramë dakord për një angazhim të përforcuar të Aleancës në luftën kundër terrorizmit, për të vijuar me rritjen e buxheteve të Mbrojtjes, si dhe për një vëmëndje të shtuar në Ballkan ku roli i aktorëve të tretë ndikon në përkeqësimin e situatës së sigurisë. Në kuadër të përpjekjeve për një shpërndarje më të drejtë të përgjegjësive brenda aleancës, Shqipëria ka rritur buxhetin e Mbrojtjes në vitet 2016-2017, si dhe investimet për modernizimin e forcave të armatosura. Kontributet tona, konkrete dhe në rritje, e rendisin Shqipërinë krah aleatëve dhe partnerëve më aktivë në misionet dhe operacionet e NATO-s, duke përfshirë Afganistanin, Kosovën, detin Egje dhe së shpejti Letoninë. Vëmëndja e shtuar e NATO-s mbetet thelbësore për t’iu përgjigjur sfidave të sigurisë me të cilat po përballet rajoni i Ballkanit Perëndimor” – shkruan Bushati.
