Në Bruksel është mbajtur takimi i shtatë i Këshillit të Stabilizim-Asocimit, Shqipëri-BE. Delegacioni shqiptar përfaqësohet nga ministrja e Integrimit, Klajda Gjosha, ministri i Jashtëm, Ditmir Bushati, dhe kryetarja e Komisionit të Integrimit, Majlinda Bregu.
Nga ana tjetër, delegacioni i Bashkimit Europian kryesohet nga komisioneri Johannes Hahn dhe ministri i Jashtëm i Letonisë.
Në një konferencë të përbashkët për mediat të ministrit të Jashtëm, Ditmir Bushati komisioneri Johannes Hahn dhe ministri i Jashtëm i Letonisë, Edgars Rinkevics është evidentuar edhe një herë puna dhe përpjekjet që duhen bërë për antarësimin në Bashkimi Europian.
Në fjalën e tij Ministri Bushati u ndal në situatën në rajon ku theksoi se ngjarjet e fundit veçanërisht në Maqedoni kanë treguar rreziqet e bllokimit të procesit të integrimit.
“Ngjarjet e fundit në rajon kanë treguar rreziqet e bllokimit të procesit të integrimit. Ne presim nga BE-ja që të çojë sinjale të forta për Shqipërinë dhe për vendet e rajonit për ecjen përpara të këtij procesi”, tha Bushati.
I pyetur në lidhje me raportin e Shqipëri-Greqi duke marë parasysh anulimin e vizitës së Ministrit të Jashtëm Grek dhe me problemet me ujrat detare, Bushati është shprehur se qeveria shqiptare është e angazhuar për marrëdhënie të mira fqinjësore me Greqinë. Ai tha se nuk ka dijeni në lidhje me anulimin e vizitës së ministrit grek.
“Me Greqinë ne jemi të angazhuar për marrdhënie të mira fqinjësore, pasi ajo është partneri ynë strategjik. Për anulimin e vizitës së Ministrit të Jashtëm grek, unë kam qenë në kontakt me të dhe nuk di asgjë. Të dyja qeveritë kanë qenë të angazhuar në zgjidhjen e problemeve që kanë dy vendet”, tha Bushati.
